Visithorga.is

Bjartar myndir birtast nú
burtu hrinda trega,
vekur yndi von og trú
vorið yndislega.
                   Steinberg Friðfinnsson

Gott var hjá þér, Grímur minn,
glæný egg að éta
en keraldsvíðan koppinn þinn            
kunnum við ekki að meta.
                    Aðalheiður Jónsdóttir

Enginn sálar öðlast frið
efst sem prjálið setur.
Íhalds brjálað auðvaldið
öllu kálað getur.
                    Ari Friðfinnsson

Að eiga fljóð, sem eru góð,
engum bjóða þvaður,
lítinn sjóða saman óð
syngja ljóðin glaður.
                    Arnsteinn Stefánsson

Gott finnst mér í glas að fá
glitrar vökvinn rauði.
Maður lifir ekki á
einu saman brauði.
                   Þórir Valgeirsson

Rjóð í kinnum, göfug, góð,
góðan kynnti og dýran óð,
óðinn fagra, ljúfust ljóð,
ljóðin, sem að geymast þjóð.
                    Árni Júlíus Haraldsson

Þrjóta dyggðir sumra senn
sortna tærar lindir.
Þjóta skeyti Amors enn
ýmsra freista syndir.
                   Davíð Guðmundsson

Vorið kemur víst er það.
Vetur burtu læðist.
Gróa hlíðar grænkar blað.
Gleði í augum fæðist.
                   Kristín Brynjólfsdóttir

Glymur hátt í gljúfrasal.
Glampar bára í sjánum.
Fagurt er um fjöll og dal
fuglar syngja í trjánum.
                    Pétur Jónsson

Oft mig langar út í sveit,
æsku ganga haga,
þegar vanga vorsól heit
vermir langa daga.
                    Ari Friðfinnsson

Féllu tár um föla kinn
flaut í bárum hugur minn.
Fregnin sár um fardag þinn
flaug sem ljár í hjartað inn.
                    Eiður Jónsson

Skorna mela skeifur strjúka,
skrokkinn fákar teygja.
Rauðir neistar rjúka
í rökkrið út, og deyja.
                    Reynir Hjartarson

Vorsins máttinn vekur fljótt
veðrið breytt úr köldu í heitt.
Hörgá brátt þá æsist ótt,
áfram greitt fær jökum fleytt.
                    Friðbjörn Björnsson

Fagurt er við Eyjafjörð
ágústnótt að vaka.
Þegar himinn, haf og jörð
höndum saman taka.
                    Þórir Valgeirsson

Betra er fljóðið geldri geit
að gera slóð í fjúki.
Hún er rjóð og hökufeit
og heldur góð í brúki.
                    Steinberg Friðfinnsson

Braga rutli beljurnar
betur skutlum taka.
Er ég tutla elskurnar
í mér gutlar staka.
                    Davíð Guðmundsson

Dável skráði lífsins ljóð,
lék að hýrum sprundum,
freistinganna fann þar óð
og féll á henni stundum.
                    Arnsteinn Stefánsson

Lífið þróast, léttist brá
linast snjóatakið.
Heyra í móum friðar fá
fyrsta lóukvakið.
                    Jóhann Sveinsson